मतदारयादी पुनरीक्षणासाठी ECINet प्रक्रियेत बदल; महाराष्ट्राच्या मागण्यांना मान्यता.

मुंबई, २१ ऑक्टोबर, Nvnews: मतदारयादीतील नोंदींची पडताळणी करताना येणाऱ्या अडचणी कमी करण्यासाठी निवडणूक आयोगाने ECINet सॉफ्टवेअर आणि विशेष सखोल पुनरीक्षण प्रक्रियेत चार बदल केले आहेत. महाराष्ट्राचे मुख्य निवडणूक अधिकारी एस. चोक्कलिंगम यांनी सुचवलेल्या बदलांचा यात समावेश आहे.मतदाराच्या नोंदींचा मागील पुनरीक्षणाच्या यादीशी दुवा जुळत नसल्यास किंवा नाव-वय यांसारख्या तपशिलांत विसंगती आढळल्यास कागदपत्रांची पडताळणी लागू शकते. नव्या प्रक्रियेनुसार बूथ लेव्हल ऑफिसर मतदाराच्या घरी जाऊन कागदपत्रे गोळा करून अपलोड करू शकतील.
वैयक्तिक सुनावणी प्रत्येक प्रकरणात घेण्याऐवजी ती अपवादात्मक ठेवण्याची तरतूद करण्यात आली आहे. नोटिशीत नमूद केलेल्या १३ प्रकारांपुरतेच कागदपत्रे मर्यादित नसतील; मतदार इतर संबंधित कागदपत्रेही आता सादर करू शकतील.
नोंदीतील विसंगती तपासताना निवडणूक नोंदणी अधिकारी आणि सहाय्यक अधिकाऱ्यांना अधिक निर्णयस्वातंत्र्य देण्यात आले आहे. प्रत्येक प्रकरणात मागील विशेष पुनरीक्षण यादीचा उतारा अनिवार्यपणे अपलोड करण्याची अटही काढण्यात आली आहे.