टायगर श्रॉफच्या कारवर जुहूत गोळीबार; अभिनेता सुरक्षित, चालकासह दोघे जखमी.

मुंबई,19 ऑक्टोबर,NVnews-बॉलिवूड अभिनेता टायगर श्रॉफच्या कारवर मुंबईतील जुहू येथे गोळीबार झाल्याने खळबळ उडाली आहे. कारमध्ये टायगर उपस्थित असताना हल्लेखोरांनी गोळीबार करण्यात आला आहे.या घटनेतून टायगर श्रॉफ सुरक्षित बचावला आहे मात्र त्याचा चालक आणि जवळील एक व्यक्ती जखमी झाले. हल्लेखोरांचा शोध घेण्यासाठी मुंबई पोलिसांनी तपासाची चक्रे वेगाने फिरवली आहेत.

ही घटना जुहूतील पुष्पा नरसी पार्क परिसरात, जुहू पोलिस ठाण्याच्या हद्दीत घडली. प्राथमिक माहितीनुसार, दुचाकीवरून आलेल्या हल्लेखोरांनी टायगरच्या कारवर गोळीबार केला आणि घटनास्थळावरून पळ काढला.

गोळीबारात टायगरचा चालक फिरदौस यांच्या हाताला गोळी लागल्याची माहिती समोर येत आहे. परिसरात उपस्थित असलेली आणखी एक व्यक्तीही जखमी झाली असून तिला उपचारांसाठी रुग्णालयात दाखल करण्यात आले आहे. टायगरला गोळी लागलेली नसल्याचे पोलिसांनी स्पष्ट केले आहे. घटनेनंतर त्याला पोलिस संरक्षणात सुरक्षितस्थळी नेण्यात आले.

हल्लेखोरांची ओळख पटवण्यासाठी पोलिसांनी परिसरातील सीसीटीव्ही फुटेज तपासण्यास सुरुवात केली आहे. प्राथमिक तपासानुसार, हल्लेखोरांनी वापरलेली दुचाकी अंधेरी पश्चिम रेल्वे स्थानकाजवळ सोडून पुढे गेले असावेत, अशी माहिती समोर आली आहे. आरोपींचा माग काढण्यासाठी पोलिसांची अनेक पथके काम करत आहेत.

घटनेनंतर समाजमाध्यमांवर एका पोस्टमधून लॉरेन्स बिश्नोई टोळीच्या नावाने हल्ल्याची जबाबदारी स्वीकारल्याचा दावा करण्यात आला. मात्र, या दाव्याची सत्यता पोलिसांनी अद्याप अधिकृतरीत्या निश्चित केलेली नाही. त्यामुळे हल्ल्यामागे कोणती टोळी किंवा व्यक्ती आहे, तसेच हल्ल्याचा उद्देश काय होता, याबाबत निष्कर्ष काढणे घाईचे ठरेल.

टायगरचा अभिनेता सलमान खान यांच्याशी संबंध असल्यामुळे हल्ला झाल्याचा दावाही काही पोस्टमध्ये करण्यात आला आहे. मात्र, हा दावा आणि हल्ल्याशी त्याचा संबंध तपासातून सिद्ध झालेला नाही. पोलिसांकडून सीसीटीव्ही, घटनास्थळावरील पुरावे आणि हल्लेखोरांच्या हालचालींची तपासणी सुरू आहे.