₹५,४०० देऊन जिंकला विश्वास; बनावट शेअर ट्रेडिंग प्लॅटफॉर्मवर पुण्यातील अभियंत्याची ₹६७.९४ लाखांची फसवणूक.

पुणे, ३० सप्टेंबर,NVnews, प्रतिनिधी: शेअर बाजारातील गुंतवणुकीवर मोठ्या परताव्याचे आमिष दाखवून पुण्यातील ५५ वर्षीय आयटी अभियंत्याची ₹६७ लाख ९४ हजारांची फसवणूक झाल्याचे समोर आले आहे. सुरुवातीला गुंतवणुकीबाबत साशंक असलेल्या अभियंत्याच्या खात्यात ₹५,४०० जमा करून सायबर भामट्यांनी त्याचा विश्वास संपादन केल्याची माहिती पुणे सायबर पोलिसांच्या गुन्हा नोंदीतून समोर आली आहे.
ऑगस्टमध्ये शेअर ट्रेडिंगविषयी ऑनलाइन माहिती शोधताना हा अभियंता एका व्हॉट्सॲप समूहात सहभागी झाला. समूहात शेअर्स आणि आयपीओविषयी चर्चा होत होती. त्याच्याशी संपर्क साधणाऱ्या महिलेने गुंतवणूक कंपनीची प्रतिनिधी असल्याचा दावा केला आणि मोठ्या नफ्याचे आश्वासन दिले.विश्वास बसल्यानंतर अभियंत्याने २ सप्टेंबरला ₹९.७० लाख, त्यानंतर ₹३१ लाख आणि ₹२७.२४ लाख वेगवेगळ्या खात्यांत पाठवले. बनावट प्लॅटफॉर्मवर त्याच्या खात्यात ₹८.४६ कोटी असल्याचे दाखवण्यात आले. मात्र पैसे काढण्याचा प्रयत्न केल्यावर आधी ₹१.१७ कोटी दलाली शुल्क भरण्याची मागणी झाली.संशय आल्याने अभियंत्याने १५ सप्टेंबरला मुंबईतील संबंधित खऱ्या कंपनीच्या कार्यालयात जाऊन चौकशी केली. कंपनीचे नाव गैरवापरून फसवणूक झाल्याचे लक्षात आल्यानंतर त्याने १९३० हेल्पलाइन आणि पुणे सायबर पोलिसांकडे तक्रार केली. या प्रकरणात गुन्हा नोंदवण्यात आला आहे.